20 anos de Encontros á Luz da Lúa

Hai exactamente 20 anos celebramos o primeiro encontro músico-poético á luz da lúa.

Daquela, non había concertos en miradoiros, a carón do Sil ou na contorna de petróglifos: pero creámolo e funcionou.

Levamos dúas décadas de encontros participativos á luz da lúa, desfrutando e valorando o Patrimonio de Sober en común. Durante este tempo, pasamos polos Chancís, Chanteiro, Cadeiras, Gundivós, Rosende… Acolléronnos espazos naturais, igrexas ou patios particulares. Desfrutamos de poetas e músicas coma Olga Novo, Silvia Penas, As Tanxugueiras, Bouba, Fillas de Cassandra… Vivimos momentos máxicos e centos de persoas animáronse a ler, recitar ou cantar… a expresar sen medo nun ambiente de xuntanza.

Con esta galería de imaxes queremos celebrar as nosas dúas décadas de existencia e apostamos por continuar con estes encontros populares, diversos e participativos.

Por 20 anos máis!

A vindeira cita é o 1 de agosto de 2026 en Cadeiras, ás 22 h.